काठमाडौं : विदेशी कामदार आपूर्तिका लागि आवेदन दिनेको चाप बढेपछि मलेसियाको मानव संशाधन मन्त्रालयलाई रोजगारदाताहरूको ‘क्यू’ व्यवस्थापन गर्न समस्या परेको छ । विदेशी कामदार लैजान चाहने रोजगारदाताहरूको चाप बढेपछि मन्त्रालयले उनीहरूसँगका प्रारम्भिक अन्तर्वार्ताहरूलाई कम्तीमा एक हप्ता पछिको समय दिने गरेको छ ।
मन्त्रालयले एप्वाइन्टमेन्ट दिएका रोजगारदातालाई पनि पछाडि तोकिएको मितिमा सम्पर्क गर्न भनेको छ । गत आइतबार ३ सय रोजगारदाताले प्रारम्भिक अन्तर्वार्ताका लागि समय पाएको भएपनि आधाभन्दा बढीलाई बीचबाटै फर्काइएको उक्त मन्त्रालयले जनाएको छ ।
कोरोना भाइरस (कोभिड–१९) महामारीका कारण अन्तर्राष्ट्रिय सीमा बन्द गरी दुई वर्षदेखि विदेशी कामदारको आवागमन बन्द गरेकोे मलेसियाले विदेशी कामदारका लागि आफ्नो ढोका पुनः खोलिदिएपछि ठूलो संख्यामा आवेदन प्राप्त भएका कारण भीड बढेको हो ।
‘संख्या तोकेर आवेदन माग गरेको भन्दा कम कोटा प्राप्त गर्ने रोजगारदाताहरूले पुनः आवेदन गर्नुपरेको कारणले आवेदनहरूको संख्यामा वृद्धि भयो,’ मन्त्रालयले भनेको छ । मन्त्रालयले रोजगारदाताहरूलाई नयाँ आवेदन पेश गर्नुअघि स्वीकृत पाएको सबै संख्यामा विदेशी कामदार ल्याउन आग्रह गरेको छ । मलेसिया नेपाली कामदारको पनि आकर्षक गन्तव्य हो । मलेसियामा कामदारको न्यूनतम तलब वृद्धि भएपछि आकर्षण थप बढेको छ ।
