2079-Bhadra-11
मध्यान्ह
राजेन्द्र महतो/मध्यान्ह
सिरहा : शारिरीक यातनालगायत यौन उत्पीडनविरुद्ध सिरहाकी एक महिलाले प्रहरीमा उजुरी दिएकी छन् । ईलाका प्रहरी कार्यालय लहान पुगेर माया (नाम परिवर्तन)ले आफ्नै ससुरा र देवरविरुद्ध उजुरी दिएकी हुन् ।
ईलाका प्रहरी कार्यालय लहानका डिएसपी कुमार मैनालीले शारिरीक यातना तथा यौन उत्पीडनविरुद्ध उजुरी आएको मध्यान्हलाई जानकारी दिए ।
विवाह भएको केही दिनमै शारिरीक यातना मात्र नभई ससुरा र देवरले अनैतिक क्रियाकलाप गर्न दबाब दिन थालेको उनले उजुरीमा उल्लेख गरेकी छन् ।
ससुराको सेवा गर्न सासुको दबाबमा एउटा कोठा थुनिदिएको र सासुले बाहिरबाट ढोका लगाइदिएको बताउँदै उनले देवरले विभिन्न वाहना बनाएर आफूलाई अश्लिल क्रियाकलापमा फसाएको बताइन् ।
उनी भन्छिन्, 'पटक पटक अश्लिल क्रियाकलाप गरी शारिरीक यातना समेत दिए । मेरा पति उनीहरुकै पक्षमा रहँदा माइतीdf सम्पर्क गर्न खोजें, तर सम्पर्क गर्न समेत दिएनन् ।'
आफूलाई हप्तौंसम्म घरमा थुनेर राखेको उनकाे आरोप छ । जसतसो माइतीमा सम्पर्क गरेको बताउँदै उनले त्यसपछि थप यातना दिन थालेको र कुटपिट गर्दा आफ्नो करङको हड्डी भाँचिएको समेत बताइन् ।
फलामे रडले कुटपिट गर्दा दूई हप्ता अस्पतालमै भर्ना भएर उपचार गराएको उनी बताउँछिन् ।
उनी भन्छिन्, 'एक महिनापछि आज लहान प्रहरीमा उजुरी हालें । उचित न्यायको लागि प्रहरीसँग अपेक्षा गरेको छु ।’
भारत लौकहाको डुवरवौना माइती रहेकी उनको लहान १९ छर्रापट्टीका समरुलसँग २०२१ जनवरी २२ मा विवाह भएको थियो । देवर नइम र ससुरा फुलचन हुन् ।
डिएसपी मैनालीले यसबारे अनुसन्धान गरेपछि कारबाही प्रक्रिया अगाडि बढाउने बताए । उता, आरोपित पक्षले भने बाहिर आएजस्तो घटना नरहेको दाबी गरेको छ ।
